สฺวาทิคณ
อถ สฺวาทิคโณ วุจฺจเตฯ
คิ, จิ, มิ, วุ, สุ, หิ, อาป, สกฯ
‘กา’ติ วตฺตเตฯ
๖๖๕. สฺวาทิโต กฺโณ [ก. ๔๔๘; รู. ๕๑๒; นี. ๙๒๙; จํ. ๑.๑.๙๕; ปา. ๓.๑.๗๔; ‘สฺวาทีหิ…’ (พหูสุ)]ฯ
สฺวาทีหิ กฺริยตฺเถหิ ปรํ กานุพนฺธา ณา, โณ อิติ ทฺเว ปจฺจยา โหนฺติฯ
๖๖๖. น เต กานุพนฺธนาคเมสุฯ
อิวณฺณุ’วณฺณานํ อการสฺส จ เต เอ, โอ, อา น โหนฺติ กานุพนฺธนาคเมสุ ปเรสูติ วุทฺธิปฏิเสโธฯ
สุณาติ, สุโณติฯ
คิ-สทฺเท, คิณาติ, คิโณติ, อนุคิณาติ, ปฏิคิณาติฯ
ปุพฺพสฺสรโลโป, อนุคิณนฺติ, ปฏิคิณนฺติฯ
จิ-จเย, มหาวุตฺตินา ณสฺส นตฺตํ, วฑฺฒกี ปาการํ จินาติ, จิโนติ, อาจินาติ, อาจิโนติ, อปจินาติ, อปจิโนติ, วิทฺธํเสตีติ อตฺโถฯ
ปุพฺพสฺสรโลโป, จินนฺติ, อาจินนฺติ, อปจินนฺติฯ
กมฺเม-จียติ, อาจียติ, อปจียติ, จินียติ, อาจินียติ, อปจินียติฯ
การิเต-จยาเปติ, จยาปยติ, จินาเปติ, จินาปยติ อิจฺจาทิฯ
มิ-ปกฺเขเป, มิณาติ, มิโณติ, มินาติ, มิโนติ วาฯ
วุ-สํวรเณ, สํวุณาติ, สํวุโณติ, อาวุณาติ, อาวุโณติฯ
สุ-สวเน, สุณาติ, สุโณติ, สุณนฺติ, สุณาสิ, สุโณสิฯ
รสฺสตฺเต-สุณสิ นาค [มหาว. ๑๒๖]ฯ สุณาถ, สุโณถ, สุณามิ, สุโณมิ, สุณาม, สุโณมฯ
กมฺเม ‘ทีโฆ สรสฺสา’ติ กฺยมฺหิ ทีโฆ, สูยติ, สุยฺยติ, สูยนฺติ, สุยฺยนฺติ, สุณียติ, สุณียนฺติฯ
การิเต-สาเวติ, อนุสาเวติ, สาวยติ, อนุสาวยติ, สุณาเปติ, สุณาปยติฯ
กมฺเม-สาวียติ, อนุสาวียติฯ
สุณาตุ, สุณนฺตุ, สุยฺยตุ, สุยฺยนฺตุ, สาเวตุ, สาเวนฺตุ, สุเณ, สุเณยฺย, สุเณยฺยุํ, สูเยยฺย, สุยฺเยยฺย, สูเยยฺยุํ, สุยฺเยยุํ, สาเวยฺย, สาเวยฺยุํฯ
อีอาทิมฺหิ-อสุณิ, สุณิฯ
๖๖๗. เตสุ สุโต กฺโณกฺณานํ โรฏ [ก. ๕๑๗; รู. ๔๘๘; นี. ๑๑๐๕]ฯ
เตสุ อีอาทีสุ สฺสการวนฺเตสุ จ วจเนสุ สุธาตุโต ปเรสํ กฺโณ, กฺณานํ โรฏ โหติ, รานุพนฺโธ สพฺพาเทสทีปนตฺโถฯ ‘รานุพนฺเธนฺตสราทิสฺสา’ติ สุตฺเตน อาทิสรสฺส โลโป, ทฺวิตฺตํฯ
อสฺโสสิ, อสฺโสสุํ, อสฺโสสิ, อสฺโสสิตฺถ, อสฺโสสิํ, อสฺโสสิมฺหา, อสฺโสสุมฺหา, อสฺโสสิตฺถ อิจฺจาทิฯ
สฺสตฺยาทิมฺหิ-สุณิสฺสติ, โสสฺสติ, สุณิสฺสนฺติ, โสสฺสนฺติ, สุณิสฺสสิ, โสสฺสสิ, สุณิสฺสถ, โสสฺสถ, สุณิสฺสามิ, โสสฺสามิ, สุณิสฺสาม, โสสฺสามฯ เอวํ ปรฉกฺเกฯ
สฺสาทิมฺหิ-อสุณิสฺสา, อโสสฺสา, อสุณิสฺสํสุ, โสสฺสํสุ อิจฺจาทิฯ
ปปุพฺโพ หิ-เปสเน, ปหิณาติ, ปหิโณติ, ปหิณนฺติฯ
อีอาทิมฺหิ-ทูตํ ปหิณิ, ปหิณิํสุ, ‘กฺวจิ วิกรณาน’นฺติ วิกรณโลโป, มหาวุตฺตินา ปสฺส ทีโฆ, ทูตํ ปาเหสิ [ปารา. ๒๙๗; มหาว. ๑๙๘], ปาเหสุํ อิจฺจาทิฯ
อาป-ปาปุณเน ปปุพฺโพ –
๖๖๘. สกาปานํ กุกฺกุ กฺเณ [ก. ๕๑๗; รู. ๔๘๘; นี. ๑๑๐๕; ‘‘…กุกกู เณ’’ (พหูสุ)]ฯ
สก, อาปธาตูนํ กานุพนฺธา กุการ, อุการา กเมน อาคมา โหนฺติ กฺณมฺหิ ปจฺจเยฯ
ปาปุโณติ, ปาปุณนฺติ, สมฺปาปุณนฺติฯ
ปริปุพฺโพ ปริยตฺติยํ, ปริยาปุณาติ, ปริยาปุณนฺติฯ
สํปุพฺโพ-สมาปุณาติ, ปริสมาปุณาติ, นิฏฺฐานํ คจฺฉตีติ อตฺโถฯ
กฺเณติ กึ? ปปฺโปติฯ
กมฺเม-ปาปียติ, ปาปียนฺติฯ
การิเต-ปาเปติ, ปาปยติ, ปาเปนฺติ, ปาปยนฺติฯ
กมฺเม-ปาปียติ, ปาปียนฺติฯ
อีอาทิมฺหิ-ปาปุณิ, ปาปุณิํสุ อิจฺจาทิฯ
สก-สตฺติยํ, สกฺกุโณติ, สกฺกุณาติฯ
กฺเณติ กึ? สกฺโกติ, สกฺกุณนฺติฯ
อีอาทิมฺหิ-อสกฺกุณิ, สกฺกุณิ, อสกฺกุณิํสุ, สกฺกุณิํสุฯ
๖๖๙. สกา กฺณาสฺส โข อีอาโท [‘…ณาสฺส ข…’’ (พหูสุ)]ฯ
สกมฺหา ปรสฺส กฺณาสฺส โข โหติ อีอาทิมฺหิฯ
อสกฺขิ, สกฺขิ, อสกฺขิํสุ, สกฺขิํสุ อิจฺจาทิฯ
๖๗๐. สฺเส วา [ก. ๕๑๗; รู. ๔๘๘; นี. ๑๑๐๕]ฯ
สกมฺหา ปรสฺส กฺณสฺส โข โหติ วา สฺเส ปเรฯ
สกฺขิสฺสติ, สกฺกุณิสฺสติ, สกฺขิสฺสนฺติ, สกฺกุณิสฺสนฺติ, สกฺขิสฺสสิ, สกฺขิสฺสถ, สกฺขิสฺสามิ, สกฺขิสฺสาม, สกฺกุณิสฺสามฯ
‘ทกฺข สกฺข เหหิ โหหีหิ โลโป’ติ สฺสสฺส วิกปฺเปน โลโป, สกฺขิติ, สกฺขิสฺสติ, สกฺขินฺติ, สกฺขิสฺสนฺติฯ
สฺสาทิมฺหิ-อสกฺขิสฺสา, สกฺขิสฺสา, อสกฺกุณิสฺสา, สกฺกุณิสฺสา อิจฺจาทิฯ
สฺวาทิคโณ นิฏฺฐิโตฯ